Philodendron tortum 魚骨蔓綠絨

魚骨蔓綠絨  (Philodendron tortum) 曾經嘅流行，能夠經歷時間嘅沉澱，歷久彌新，若干年後仍然可以喺自己嘅領域佔一席位，就可以被擺上神枱，奉為經典之一。 十年後如果仲有植仔，大概都要改名做植佬，而植佬要揀五棵植物擺屋企嘅話，講真白龜我唔肯定有無份，魚骨蔓綠絨我都幾肯定走唔甩。賣點唔單止係魚骨天線咁嘅葉，重有每塊新葉由一枝螢光筆尺寸嘅新芽慢慢unfold同unroll嘅過程，就好似睇緊SpaceX嘅Falcon9飛到去LEO再慢慢放個人造衛星出蒞，然後嗰隻人造衛星就會自己將幾十塊太陽能板伸長、攤開、最後將自己對啱光照嘅角度，從此日出而作日入而息，直到自己重返大氣層，或者重返地面，化作春泥更護花。自己屋企可以做到最接近satellite deployment嘅場面，P. tortum應該係幾好嘅選擇。 又講遠咗，講返養護，主要係都幾大路。淋水太密會爛根，一旦爛根都唔易recover，所需時間算係蔓綠絨入面比較長嘅一個品種，所以真係唔好俾佢爛根，我哋真係等到佢乾透先會再淋透，無論10cm定22cm盆。22cm盆差唔多一個月淋一次水。分株成功率好高，只係所需嘅時間都好耐，而且幼苗嘅生長同成株比基本上係竹蜻蜓同火箭嘅分別，所以3棵細魚骨絕對抵唔上一棵3倍尺寸嘅大魚骨。簡單蒞講，我係唔建議分株，換句話講，咁易clone到嘅點會係經典。如果你問，點解我又會有魚骨嘅分株賣？因為我唔小心整斷咗自己棵十幾葉嘅魚骨，塊塊葉都成尺長。